query_builder Thu Nov 26 2020 3:29 AM
visibility 356
ഒറ്റപ്പാലം: 17കാരന്‍ ഓടിച്ച കാറിടിച്ച് ഡോക്ടര്‍ മരിച്ച സംഭവത്തില്‍ 1 കോടി 49 ലക്ഷം രൂപ നഷ്ടപരിഹാരം നല്‍കാന്‍ മോട്ടോര്‍ ആക്‌സിഡന്റ് ക്ലെയിം ട്രിബ്യൂണല്‍ (എംഎസിടി) വിധിച്ചു. പാലക്കാട് മെഡിക്കല്‍ കോളേജ് അസി. പ്രഫസറായിരുന്ന തൃശൂര്‍ കാനാട്ടുകര പ്രശാന്തിനഗര്‍ പട്ടത്ത് വീട്ടില്‍ ഡോ. നവീന്‍ (38) മരിച്ച കേസിലാണ് ട്രിബ്യൂണല്‍ ജഡ്ജ് പി സൈദലവിയുടെ വിധി. ഹര്‍ജി ഫയല്‍ ചെയ്ത 2018 ഫെബ്രുവരി മുതല്‍ 8 ശതമാനം പലിശയും കോടതിച്ചെലവും നല്‍കണമെന്നും വിധിയിലുണ്ട്. ഇതടക്കം 1.90 കോടി രൂപയാകും മൊത്തം നഷ്ടപരിഹാരത്തുക. ഇന്‍ഷുറന്‍സ് കമ്പനിയാണ് നഷ്ടപരിഹാരം നല്‍കേണ്ടത്. ലക്കിടി സ്വദേശിയുടെ കാര്‍ പിരിയാരം സ്വദേശിയാണ് ഓടിച്ചിരുന്നത്.
പ്രായപൂര്‍ത്തിയാകാതെ കാര്‍ ഓടിച്ച കേസ് പാലക്കാട് ജുവൈനല്‍ കോടതിയില്‍ തുടരുകയാണ്. 2017 ഒക്ടോബര്‍ 7 രാത്രി 10നാണ് കേസിനാസ്പദമായ സംഭവം. പാലക്കാട് നൂറണി ചക്കാന്തറ പെട്രോള് പമ്പിനു സമീപം നവീന്‍ കുമാറും ഭാര്യയും മകനും സഞ്ചരിച്ച സ്‌കൂട്ടറില്‍ എതിരെ വന്ന കാറിടിച്ചാണ് അപടമുണ്ടായത്. അപകടത്തില ഡോ. നവീന്കുമാർ മരണപ്പെടുകയും ഭാര്യ ഡോ. ജയശ്രീ (35), മകന്‍ പാര്‍ഥിവ് (9) എന്നിവര്‍ക്ക് പരിക്കേല്‍ക്കുകയും ചെയ്തു. നഷ്ടപരിഹാരത്തുക ഉടമയില്‍ നിന്ന് ഇന്‍ഷുറന്‍സ് കമ്പനി ഈടാക്കാന്‍ സാധ്യതയുണ്ട്.
ഹര്‍ജിക്കാര്‍ക്കു വേണ്ടി അഡ്വ. കെ.കെ പ്രശാന്ത്, സുജ എസ് നായര്‍ എന്നിവര്‍ ഹാജറായി. ഒറ്റപ്പാലത്ത് വാഹനാപകട കേസില്‍ വിധിക്കുന്ന ഉയര്‍ന്ന നഷ്ടപരിഹാരത്തുകയാണിത്.