query_builder Thu Dec 3 2020 12:22 PM
visibility 240
താമരശ്ശേരി:
താമരശ്ശേരി പട്ടണത്തിലെ രണ്ടു വാർഡുകളിൽ കാലാവധി കഴിഞ്ഞ പഞ്ചായത്ത് ഭരണസമിതിയിൽ അംഗങ്ങളായിരുന്ന നാലു പേരാണ് മുഖാമുഖം ഏറ്റുമുട്ടുന്നത്. ചുങ്കം സൗത്ത് വാർഡിൽ ഐക്യജനാധിപത്യ മുന്നണിയുടെ സ്ഥാനാർത്ഥിയായി താമരശ്ശേരി ഗ്രാമപഞ്ചായത്ത് വൈസ് പ്രസിഡണ്ടായിരുന്ന നവാസ് മാസ്റ്ററും (കോൺ) ,ഇടത് മുന്നണി പിന്തുണയുള്ള വികസന മുന്നണി സ്ഥാനാർത്ഥിയായി എ.പി. മുസ്തഫയും (ഐ.എൻ.എൽ) കാരാടി വാർഡിൽ ഐക്യജനാധിപത്യ മുന്നണിയുടെ സ്ഥാനാർത്ഥിയായി സ്റ്റാൻ്റിങ് കമ്മിറ്റി ചെയർപേഴ്സണായിരുന്ന മഞ്ജിതയും വികസന മുന്നണിയുടെ ബിന്ദു ആനന്ദുമാണ് മാറ്റുരയ്ക്കുന്നത്.
കഴിഞ്ഞ ഭരണസമിയിൽ അംഗമായിരുന്ന ഈ നാലു പേരിൽ രണ്ടു പേരെ പുതിയ ഭരണസമിതി ചുമതലയേൽക്കുമ്പോൾ താമരശ്ശേരിക്ക് നഷ്ടമാകുമെന്ന കാര്യം ഉറപ്പാണ്. ഈർപ്പോണയിലെ മെമ്പറായിരുന്ന നവാസ് മാഷും കോരങ്ങാട്ടെ മെമ്പറായ എ.പി.മുസ്തഫയും , വെഴുപ്പൂരിലെ മെമ്പറായ ബിന്ദു ആനന്ദും വാർഡുകൾ മാറിയാണ് ഇത്തവണ മത്സരിക്കുന്നത്.
കാരാടിയിലെ മെമ്പറായ മഞ്ജിത ഇത്തവണയും വാർഡ് വനിതാ സംവരണമായതോടെ അവിടെ തന്നെ അവസരം ലഭിക്കുകയായിരുന്നു. നവാസ് അവസാന നിമിഷം ചുങ്കം സൗത്തിൽ പ്രാദേശിക നേതാവിനെ തഴഞ്ഞ് സ്ഥാനാർത്ഥിയായത് എതിർപ്പിനിടയാക്കിയിരുന്നു. രണ്ട് വാർഡുകളും യു.ഡി.എഫിൻ്റെ സിറ്റിങ് സീറ്റുകളാണ്. എന്നാൽ ഇത്തവണ ഇരു യിടങ്ങളിലും അട്ടിമറി വിജയം പരിചയ സമ്പന്നരായ മെംബർമാരിലൂടെ നേടിയെടുക്കുമെന്നാണ് എൽ.ഡി.എഫ് പ്രതീക്ഷ.
എൻ ഡി എ സ്ഥാനാർത്ഥികളായി ചുങ്കം വാർഡിൽ എം.ബി.ജിതേഷും , കാരാടി വാർഡിൽ ദീപ ബന്ദിഷും മത്സര രംഗത്തുണ്ട്.