query_builder Sat Dec 5 2020 1:49 AM
visibility 296
പെരിയയിലെ ബ്രിട്ടീഷ് ബംഗ്ലാവ് ഇനി ഓർമയിൽ മാത്രം. പകരം ഒരുങ്ങുന്നത് അത്യാധുനിക സൗകര്യമുള്ള സർക്കാർ വിശ്രമകേന്ദ്രം.
സ്വാതന്ത്ര്യത്തിന്‌ മുൻപ് ദീർഘദൂരം കുതിരപ്പുറത്ത് യാത്രചെയ്ത് വരുന്ന ബ്രിട്ടീഷ് ഭരണാധികാരികൾക്ക് കുതിരകളെ കെട്ടിയിട്ട് വിശ്രമിക്കാനും മറ്റുമായി പണിത ബംഗ്ലാവാണിത്. പിന്നീട് നികുതിപിരിവ് കേന്ദ്രവും ഗ്രാമീണ കോടതിയുമായി വരെ മാറി. പതിറ്റാണ്ടുകളുടെ ഓർമകൾ പേറി നിലകൊണ്ട ബംഗ്ലാവിന്റെ സ്ഥാനത്ത് ഇനി സർക്കാർവക വിശ്രമകേന്ദ്രം ഒരുങ്ങും. ഉദുമ എം.എൽ.എ. കെ.കുഞ്ഞിരാമന്റെ ഇടപെടലിലാണ് നാശോന്മുഖയിക്കിടന്നിടത്ത് പുത്തൻ കെട്ടിടം ഉയരുന്നത്. പൊതുമരാമത്ത് വകുപ്പ് രണ്ടുകോടി എൺപതുലക്ഷം രൂപ ചെലവിലാണ് വിശ്രമകേന്ദ്രം ഒരുക്കുന്നത്. തിരഞ്ഞെടുപ്പിനുശേഷം തറക്കല്ലിടൽ ചടങ്ങ് നടത്തി ദ്രുതഗതിയിൽ പണി പൂർത്തിയാക്കാനാണ് തീരുമാനം. ബംഗ്ലാവിരുന്നിടത്ത് ഒരേക്കർ 60 സെന്റ് ഇതിനായി അളന്ന് തിട്ടപ്പെടുത്തിയിട്ടുണ്ട്. ജില്ലയുടെ മധ്യഭാഗത്ത് ദേശീയപാതയോട് ചേർന്ന് പെരിയ-കല്യോട്ട് റോഡരികിലാണ് വിശ്രമകേന്ദ്രം. ആയംകടവ് പാലത്തിലെ ടൂറിസം പദ്ധതി, കേന്ദ്ര സർവകലാശാല, സർക്കാർ ആലോചനയിലുള്ള ചെറുവിമാനത്താവളം എന്നിവ ഇതിന്റെ ഭാവി സാധ്യത വർധിപ്പിക്കുന്നു.
രണ്ട്‌ നിലയിൽ വിശ്രമമുറികളും അടുക്കളയും പാർക്കിങ് സൗകര്യവും ഉൾപ്പെടെയാണ് നിർമാണം. സാമൂഹിക ആരോഗ്യ കേന്ദ്രത്തോട് ചേർന്ന് പെരിയയ്ക്ക് തണലേകുന്ന വൻ മരങ്ങളുടെ ഇടയിലാണ് ബംഗ്ലാവ് നിലനിന്നിരുന്നത്. ബംഗ്ലാവ് നീക്കി പുതിയ കെട്ടിടം പണിയുമ്പോൾ തണൽമരങ്ങൾ വെട്ടിമാറ്റരുത് എന്ന ആവശ്യം മാത്രമാണ് നാട്ടുകാർക്ക് ഉള്ളത്.