query_builder Sat Dec 5 2020 1:51 PM
visibility 183
ഒറ്റനോട്ടത്തില്‍ കാണാന്‍ കഴിയാത്ത വിധം കെട്ടിടത്തിന്റെ വരാന്ത അവസാനിക്കുന്നിടത്തായിരുന്നു മൃതദേഹം കിടന്നിരുന്നത്
അടിമാലി: അടിമാലി ടൗണില്‍ മധ്യവയസ്‌ക്കനെ മരിച്ചനിലയില്‍ കണ്ടെത്തി.സംഭവത്തിന് പിന്നില്‍ കൊലപാതകമാണെന്നാണ് പോലീസ് നല്‍കുന്ന സൂചന.അടിമാലി ടൗണിലും മറ്റുമായി താമസിച്ച് വന്നിരുന്ന കൊച്ചുപാറക്കല്‍ മാത്യുവി(50)ന്റെ മൃതദേഹമാണ് ഹില്‍ഫോര്‍ട്ട് ജംഗ്ഷന് സമീപമുള്ള കെട്ടിടത്തിന്റെ ഒന്നാംനിലയില്‍ ശനിയാഴ്ച്ച കാണപ്പെട്ടത്.സമീപത്തെ വ്യാപാര സ്ഥാപനം തുറക്കാന്‍ എത്തിയ ആള്‍ മൃതദേഹം കാണുകയും വിവരം പോലീസില്‍ അറിയിക്കുകയുമായിരുന്നു.തുടര്‍ന്ന് പോലീസ് സ്ഥലത്തെത്തി അന്വേഷണം നടത്തിയതിലൂടെ മൃതദേഹം മാത്യുവിന്റേതാണെന്ന് തിരിച്ചറിഞ്ഞു.ബന്ധുക്കളെ സ്ഥലത്തെത്തിച്ച് മൃതദേഹം മാത്യുവിന്റേതെന്ന് ഉറപ്പുവരുത്തിയ ശേഷം ഇന്‍ക്വസ്റ്റ് നടപടികള്‍ പൂര്‍ത്തീകരിച്ച് പോലീസ് മൃതദേഹം മോര്‍ച്ചറിയിലേക്ക് മാറ്റി.ഫോറന്‍സിക് വിദഗ്തരും ഡോഗ് സ്‌ക്വാഡും സ്ഥലത്തെത്തി പരിശോധന നടത്തി തെളിവുകള്‍ ശേഖരിച്ചു.സംഭവത്തിന് പിന്നില്‍ കൊലപാതകമാണെന്ന തരത്തിലുള്ള ചില സൂചനകള്‍ ലഭിച്ചതായും മാത്യുവിന്റെ സുഹൃത്തുക്കളായ ചിലരെയും വെള്ളിയാഴ്ച്ച രാത്രി സംഭവസ്ഥലത്തിന് സമീപത്തുണ്ടായിരുന്ന ചിലരേയും ചോദ്യം ചെയ്തു വരികയാണെന്നും അടിമാലി സി ഐ അനില്‍ ജോര്‍ജ്ജ് പറഞ്ഞു.ഒറ്റനോട്ടത്തില്‍ കാണാന്‍ കഴിയാത്ത വിധം കെട്ടിടത്തിന്റെ വരാന്ത അവസാനിക്കുന്നിടത്തായിരുന്നു മൃതദേഹം കിടന്നിരുന്നത്.മൃതദേഹത്തിനരികെ രക്തം തളംകെട്ടി കിടന്നിരുന്നതായും ഇവിടെ നിന്നും ഒരു സിമന്റിഷ്ടികയുടെ ഭാഗം കണ്ടെടുത്തതായും പോലീസ് സൂചന നല്‍കുന്നുണ്ട്.പലവിധ ജോലികളുമായി ഏറെ കാലമായി അടിമാലി ടൗണില്‍ കഴിഞ്ഞിരുന്ന മാത്യു കടകളുടെയും മറ്റും വരാന്തകളിലായിരുന്നു കിടന്നുറങ്ങിയിരുന്നതെന്നാണ് വിവരം.കൊവിഡ് പരിശോധനക്കും പോസ്റ്റുമോര്‍ട്ടത്തിനും ശേഷം മൃതദേഹം ബന്ധുക്കള്‍ക്ക് വിട്ടുനല്‍കും.