query_builder Wed Dec 2 2020 8:20 AM
visibility 792
പാലാരിവട്ടം പാലം: ലോഡ് ടെസ്റ്റ് തടയാന്‍ ഒന്നര വര്‍ഷം ജനങ്ങളെ ദ്രോഹിച്ചു
കോഴിക്കോട്: പാലാരിവട്ടം പാലത്തിന്റെ ബലക്ഷയം പരിശോധിക്കാനുള്ള ലോഡ് ടെസ്റ്റ് തടയാന്‍ കോടതികള്‍ കയറിയിറങ്ങി ഒന്നര വര്‍ഷം എല്‍ഡി.എഫ് സര്‍ക്കാര്‍ ജനങ്ങളെ ദ്രോഹിച്ചതായി മുന്‍ മുഖ്യമന്ത്രി ഉമ്മന്‍ ചാണ്ടി. ഹൈക്കോടതിയും തുടര്‍ന്ന് സുപ്രിം കോടതിയിലുമായി കോടികളാണ് ഇതിനു വേണ്ടി ചെലവഴിച്ചത്. പാലത്തിന്റെ 30 ശതമാനം പൂര്‍ത്തിയാക്കിയത് ആരാണ്. പാലത്തിന്റെ ക്രെഡിറ്റ് ഏറ്റെടുത്ത് ലക്ഷങ്ങള്‍ പൊടിച്ച്് ഉദ്ഘാടനം നടത്തിയവരാണ് ഇപ്പോള്‍ ഇബ്രാഹിം കുഞ്ഞിനെതിരെ കേസെടുത്തിരിക്കുന്നത്. കരാറില്‍ ഇബ്രാഹിം കുഞ്ഞ് ഇടപെട്ടതായി പറഞ്ഞിട്ടില്ല. എല്ലാ നടപടിക്രമങ്ങളും പാലിച്ചാണ് പാലത്തിന്റെ നിര്‍മാണം. മൊബിലൈസേഷന്‍ അഡ്വാന്‍സ് കൊടുക്കണമെന്ന ഫയലില്‍ ഒപ്പിട്ടതു മാത്രമാണ് ഇബ്രാഹിം കുഞ്ഞ് ചെയ്ത തെറ്റ്. ഇതാകട്ടെ പലിശ സഹിതം സര്‍ക്കാറിന് തിരിച്ചു കിട്ടിയതുമാണ്.
രമേഷ് ചെന്നിത്തലക്കെതിരായ ആക്ഷേപവും പഴയതാണ്. ചെന്നിത്തലയെയോ യു.ഡി.എഫിനെയോ ക്ഷീണിപ്പിക്കാമെന്ന് കരുതേണ്ട. സര്‍ക്കാറിനെതിരായ അഴിമതിയും സ്വജനപക്ഷപാതവും സര്‍ണക്കള്ളക്കടത്തുമെല്ലാം ജനങ്ങളോട് പറയുന്നതാണ് അവരെ ചൊടിപ്പിക്കുന്നത്. അഴിമതി നടന്നിട്ടുണ്ടെങ്കില്‍ എന്തു കൊണ്ട് സര്‍ക്കാര്‍ അധികാരത്തില്‍ വന്ന് അഞ്ചു കൊല്ലം കാത്തിരുന്നുവെന്നും അദ്ദേഹം ചോദിച്ചും. കാലിക്കറ്റ് പ്രസ്‌ക്ലബ്ബിന്റെ മീറ്റ് ദ ലീഡര്‍ പരിപാടിയില്‍ സംസാരിക്കുകയായിരുന്നു അദ്ദേഹം.
മുരളീധരന്‍ സമുന്നത നേതാവാണ്. അദ്ദേഹത്തിന്റെ അഭിപ്രായം കണക്കിലെടുക്കും.
കെ.എസ്.എഫ്.ഇ നല്ലൊരു സ്ഥാപനമാണ്. എന്നാല്‍ അവിടെ അഴിമതി നടക്കുന്നതായാണ് വിജിലന്‍സ് പറയുന്നത്. ഹൈസ്പീഡ് റെയിലിന് യാതൊരു അനുമതിയും ലഭിച്ചിട്ടില്ല. ചെലവി 1.27 കോടിയാണെന്ന് നീതി ആയോഗ് തന്നെ വ്യക്തമാക്കിയിട്ടുണ്ട്. യു.ഡി.എഫ് സര്‍ക്കാര്‍ കൊണ്ടു വന്ന ഓട്ടോമാറ്റിക് സിഗ്നലിംഗ് പദ്ധതി സര്‍ക്കാര്‍ തള്ളുകയായിരുന്നു. 3000ല്‍ പരം കോടിയിലൊതുങ്ങുന്ന പദ്ധതി നടപ്പായാല്‍ 2 കിലോമീറ്റര്‍ ഇടവിട്ട് ട്രെയിന്‍ ഓടിക്കാന്‍ കഴിയും. അതു മാറ്റിവെച്ചാണ് നടക്കാത്ത പദ്ധതികളുമായി മുന്നോട്ടു പോകുന്നത്. അനുമതിയില്ലെങ്കിലും കല്ലിടാന്‍ പോകുമ്പോള്‍ ജനങ്ങള്‍ക്ക് ആശങ്കയുണ്ടാകും. സമരം നടക്കുന്ന പ്രദേശം സന്ദര്‍ശിക്കുമെന്നും അദ്ദേഹം പറഞ്ഞു.
കര്‍ഷക സമരം ഇന്ത്യയുടെ മുഖമാണ്. കോണ്‍ഗ്രസ് മുന്‍പന്തിയില്‍ തന്നെയുണ്ടാകും
യു.ഡി.എഫിന് പുറത്ത് ആരുമായും സഖ്യമില്ലെന്ന് വെല്‍ഫെയര്‍ പാര്‍ട്ടി ബന്ധത്തെ കുറിച്ചുള്ള ചോദ്യത്തിന് അദ്ദേഹം പറഞ്ഞു. മുന്‍പ് മാലയിട്ടു പോയവരാണ് ഇപ്പോള്‍ ആക്ഷേപം ഉന്നയിക്കുന്നത്. ആ മുന്തിരി കണ്ട് പുളിക്കേണ്ടെന്നും അദ്ദേഹം കൂട്ടിച്ചേര്‍ത്തു. പ്രസ്‌ക്ലബ് പ്രസിഡന്റ് എം ഫിറോസ്ഖാന്‍ അധ്യക്ഷത വഹിച്ചു. സെക്രട്ടറി പി.എസ് രാകേഷ് സ്വാഗതം ആശംസിച്ചു.