query_builder Mon Dec 7 2020 4:21 PM
visibility 323
കണ്ണൂര്‍: പോക്സോ കേസില്‍ ആരോപണ വിധേയനായ ചൈല്‍ഡ് വെല്‍ഫെയര്‍ കമ്മിറ്റി കണ്ണൂര്‍ ജില്ലാ ചെയര്‍മാന്‍ ഇ.ഡി ജോസഫിനെ ചുമതലകളില്‍ നിന്നും ഒഴിവാക്കി. അന്വേഷണം അവസാനിക്കുന്നതുവരെ ചെയര്‍പേഴ്സണ്‍, സി.ഡബ്ല്യു.സി മെമ്പര്‍ എന്നീ ചുമതലകളില്‍ നിന്നും ഒഴിവാക്കിക്കൊണ്ടാണ് സാമൂഹ്യനീതി വകുപ്പ് ഉത്തരവിട്ടത്. കഴിഞ്ഞ ദിവസമാണ് ശിശുക്ഷേമ സമിതി
കണ്ണൂര്‍ ജില്ലാ ചെയര്‍മാനെതിരെ തലശേരി പോലിസ് പോക്സോ നിയമപ്രകാരം കേസെടുത്തത്. പോക്സോ കേസിലെ ഇരയെ കൗണ്‍സിലിംഗിനായി കൊണ്ടുവന്നപ്പോള്‍ ഇ.ഡി ജോസഫ് മോശമായി സംസാരിച്ചു എന്നാണ് കുട്ടി മജിസ്ട്രേറ്റിന് നല്‍കിയ രഹസ്യമൊഴി. പെണ്‍കുട്ടിയുടെ രഹസ്യമൊഴിയുടെ അടിസ്ഥാനത്തിലാണ് ഇ.ഡി ജോസഫിനെതിരെ തലശേരി പോലിസ് കേസെടുത്തത്.സംഭവത്തില്‍ സംസ്ഥാന ബാലാവകാശ കമ്മിഷനും സ്വമേധേയ കേസെടുത്തിരുന്നു. ഒക്ടോബര്‍ 21ന് പെണ്‍കുട്ടിയെ കൗണ്‍സിലിംഗിനായി തലശേരി എരഞ്ഞോളിയിലെ ശിശുക്ഷേമ സമിതിയുടെ ഓഫിസിലെത്തിച്ചിരുന്നു. ഈ സമിതിക്ക് മുമ്പാകെ കൗണ്‍സിംഗിന് ഹാജരായപ്പോള്‍ തന്നോട് ഇ.ഡി ജോസഫ് മോശമായി പെരുമാറിയെന്നാണ് മജിസ്ട്രേറ്റിനോട് 17 വയസ്സുകാരിയായ പെണ്‍കുട്ടി രഹസ്യമൊഴിയില്‍ പറഞ്ഞിരിക്കുന്നത്. കേസ് പരിഗണിക്കുന്നതിനിടെ, ലൈംഗികച്ചുവയോടെ സംസാരിച്ചെന്നും പരിഹസിക്കുന്ന ഭാഷയിലാണ് സംസാരിച്ചതെന്നും പെണ്‍കുട്ടി പരാതിയില്‍ പറയുന്നു. കണ്ണൂര്‍ കുടിയാന്‍മല പോലിസ് സ്റ്റേഷന്‍ പരിധിയില്‍ റജിസ്റ്റര്‍ ചെയ്ത പോക്സോ കേസുമായി ബന്ധപ്പെട്ട് ശിശുക്ഷേമ സമിതിക്ക് മുന്നില്‍ കൗണ്‍സിലിംഗിനായാണ് ഈ പെണ്‍കുട്ടി എത്തിയത്.