query_builder Sat Dec 5 2020 3:11 PM
visibility 213
മാള: സംസ്ഥാനത്ത് നടപ്പാക്കുന്നത് സ്വപ്ന പദ്ധതിയാണെന്ന് പിണറായി വിജയൻ ഇത്രയും കാലം പറഞ്ഞിരുന്നത് സ്വപ്നയുടെ പദ്ധതിയാണെന്ന് ജനം തിരിച്ചറിഞ്ഞിരിക്കുകയാണെന്ന് ബി.ജെ.പി.സംസ്ഥാന പ്രസിഡന്റ് കെ.സുരേന്ദ്രൻ
പറഞ്ഞു. എൻ.ഡി.എ.മാള മേഖലാ കൺവെൻഷൻ ഉദ്‌ഘാടനം നിർവ്വഹിച്ച് സംസാരിക്കുകയായിരുന്നു അദ്ദേഹം. പി.എസ്.സി.പരീക്ഷ പാസായി കാത്തിരിക്കുന്നവരെ ഒഴിവാക്കി പത്താം ക്ലാസ് യോഗ്യത പോലും ഇല്ലാത്ത രവീന്ദ്രനും സ്വപ്നയ്ക്കും വരെ ലക്ഷങ്ങൾ ശമ്പളം കിട്ടുന്ന ജോലി കൊടുക്കുകയാണെന്നും സുരേന്ദ്രൻ കൂട്ടിച്ചേർത്തു. കള്ളന്മാരെ പിടിക്കേണ്ട പൊലീസും സർക്കാരും കള്ളക്കടത്ത് നടത്തുകയാണ്. തിരഞ്ഞെടുപ്പ് പ്രവർത്തനത്തിന് പോലും പിണറായി വിജയനെ എൽ.ഡി.എഫ്.മുന്നിൽ നിറുത്തുന്നില്ല.കേരളത്തിൽ വലിയ മാറ്റത്തിന് അടിത്തറയിടുന്ന തിരഞ്ഞെടുപ്പാണ് നടക്കുന്നത്.എൽ.ഡി.എഫ്.ന്റെ സാമൂഹ്യ അടിത്തറ സമ്പൂർണമായി തകരും. പരമ്പരാഗത മുന്നണി ഭരണ സമ്പ്രദായം മാറും. നരേന്ദ്ര മോഡി തരംഗം കേരളത്തിൽ കൊടുങ്കാറ്റായി മാറുമെന്നും കെ.സുരേന്ദ്രൻ വ്യക്തമാക്കി. ബി.ജെ.പി.കൊടുങ്ങല്ലൂർ നിയോജകമണ്ഡലം പ്രസിഡന്റ് കെ.എസ്.വിനോദ് അദ്ധ്യക്ഷത വഹിച്ചു.ബി.ഡി.ജെ.എസ്.ജില്ലാ പ്രസിഡന്റ് സി.ഡി.ശ്രീലാൽ മുഖ്യപ്രഭാഷണം നടത്തി.മണ്ഡലം പ്രസിഡന്റ് പി.ആർ.ദിനിൽ മാധവ്,കെ.പി.ജോർജ്ജ്,ടി.ബി.സജീവൻ,പി.കെ.രവീന്ദ്രൻ ലോചനൻ അമ്പാട്ട്,ബേബിറാം എൽ.കെ.മനോജ്,കെ.എസ്.അനൂപ്,സി.എസ്.സന്തോഷ്,സുനിൽ വർമ്മ തുടങ്ങിയവർ സംസാരിച്ചു.
