query_builder Sun Dec 6 2020 6:59 AM
visibility 149
പാറശാല: പാറശാല ജില്ലാ ഡിവിഷൻ തിരികെ പിടിക്കാൻ യു.ഡി.എഫും സീറ്റ് നിലനിറുത്താൻ എൽ.ഡി.എഫും ഇഞ്ചോടിഞ്ച് പോരാടുമ്പോൾ ഇരുമുന്നണികളെയും വെല്ലാൻ ശക്തയായ സ്ഥാനാർത്ഥിയെ രംഗത്തിറക്കി ബി.ജെ.പിയും രംഗത്ത്. 2000 മുതൽ കോൺഗ്രസിനെ തുണയ്ക്കുന്ന ഡിവിഷൻ കഴിഞ്ഞ തവണ എൽ.ഡി.എഫ് പിടിച്ചെടുക്കുകയായിരുന്നു. മഹിളാ കോൺഗ്രസ് സംസ്ഥാന സെക്രട്ടറിയായ എസ്. ഉഷാകുമാരിയാണ് യു.ഡി.എഫ് സ്ഥാനാർത്ഥി. മുൻ ബ്ലോക്ക് പഞ്ചായത്ത് പ്രസിഡന്റും മഹിളാ അസോസിയേഷൻ ഏരിയാ വൈസ് പ്രസിഡന്റുമായ വി.ആർ. സലൂജയാണ് എൽ.ഡി.എഫിന്റെ സ്ഥാനാർത്ഥി. തത്വമസി ട്രസ്റ്റ് ബാലികാ സദനത്തിന്റെ ജോയിന്റ് സെക്രട്ടറിയും സഹകാർ ഭാരതി സംസ്ഥാന സെക്രട്ടറിയും ബി.ജെ.പി ജില്ലാ കമ്മിറ്റി അംഗവുമായ ബി.എസ്. ജയയാണ് ബി.ജെ.പിയുടെ സ്ഥാനാർത്ഥി.
വിദ്യാർത്ഥി പ്രസ്ഥാനത്തിലൂടെ കോൺഗ്രസിലെത്തിയ എസ്. ഉഷാകുമാരി രണ്ട് തവണ മര്യാപുരത്തെ പ്രതിനിധീകരിച്ച് ബ്ലോക്ക് പഞ്ചായത്തിലും ഒരു തവണ മര്യാപുരം ജില്ലാ ഡിവിഷനെ പ്രതിനിധീകരിച്ച് ജില്ലാ പഞ്ചായത്തിലും അംഗമായിട്ടുണ്ട്. അദ്ധ്യാപികയും നർത്തകിയുമായ വി.ആർ. സലൂജയും വിദ്യാർത്ഥി രാഷ്ട്രീയത്തിലൂടെയാണ് പൊതുരംഗത്ത് എത്തുന്നത്. 2010ൽ ചെങ്കൽ ഗ്രാമ പഞ്ചായത്ത് അംഗമായിരുന്നു. 2015ൽ ബ്ലോക്ക് പഞ്ചായത്തിലെ മര്യാപുരം ഡിവിഷനിലേക്കുള്ള മത്സരത്തിൽ ഇപ്പോൾ കോൺഗ്രസ് സ്ഥാനാർത്ഥിയായ ഉഷാകുമാരിയെ പരാജയപ്പെടുത്തി ബ്ലോക്ക് പ്രസിഡന്റ് ആയിരുന്നു. സഹകാർ ഭാരതി സംസ്ഥാന സെക്രട്ടറിയും ബി.ജെ.പി ജില്ലാ കമ്മിറ്റി അംഗവുമായ ബി.എസ്. ജയ 2005 -ൽ ഉദിയൻകുളങ്ങര ബ്ലോക്ക് ഡിവിഷനിൽ മത്സരിച്ചിട്ടുണ്ട്. കഴിഞ്ഞ തിരഞ്ഞെടുപ്പിൽ എൽ.ഡി.എഫിലെ അഡ്വ.എസ്.ബെൻഡാർവിനാണ് ഇവിടെ വിജയിച്ചത്.