query_builder Sun Dec 6 2020 11:37 AM
visibility 153
കാഞ്ഞിരപ്പുഴ ഇടതുകര കനാല്‍വഴി ജലവിതരണം പുനരാരംഭിച്ചു.
ചോർച്ച അടച്ച തച്ചമ്പാറ നെല്ലിക്കുന്ന് തെക്കുംപുറം ഭാഗത്ത് കനാലിൽ വെള്ളം എത്തിയപ്പോൾ
തച്ചമ്പാറ:കാഞ്ഞിരപ്പുഴ ഇടതുകര കനാലില്‍ നെല്ലിക്കുന്ന് തെക്കുമ്പുറം ഭാഗത്തെ ചോര്‍ച്ചയ്ക്ക് പരിഹാരം കണ്ടതോടെ ഞായറാഴ്ച മുതൽ ജലവിതരണം പുനരാരംഭിച്ചു.
കഴിഞ്ഞ തിങ്കളാഴ്ചയാണ് കർഷകരുടെ ആവശ്യത്തെത്തുടർന്ന് കൃഷി ആവശ്യത്തിനായി കാഞ്ഞിരപ്പുഴ ഇടതുകര കനാല്‍ വഴി ആദ്യം വെള്ളം തുറന്ന് വിട്ടത്.പൊന്നങ്കോടും, നെല്ലിക്കുന്ന് തെക്കുമ്പുറം ഭാഗത്തും ചോര്‍ച്ചയുണ്ടായതിനെ തുടര്‍ന്ന് ജലവിതരണം അന്നുതന്നെ നിര്‍ത്തി വെക്കുകയായിരുന്നു. ഇത് താത്കാലികമായി പരിഹരിച്ച് പിറ്റേദിവസം വീണ്ടും കാനാല്‍ വഴി വെള്ളം വിട്ടെങ്കിലും നെല്ലിക്കുന്ന് ഭാഗത്തെ ചോര്‍ച്ച പ്രതികൂലമായി ബാധിച്ചതോടെ കനാല്‍ അടക്കേണ്ടി വന്നു. ശാശ്വതമായി പ്രശ്‌നം പരിഹരിക്കാതെ ജലവിതരണം തുടരാന്‍ സാധിക്കില്ലെന്ന് വന്നതോടെയാണ് മന്ത്രി കെ കൃഷ്ണൻകുട്ടിയുടെ ഇടപെടലിനെത്തുടർന്ന് രണ്ടിടങ്ങളിലും യുദ്ധകാലാടിസ്ഥാനത്തില്‍ ചോര്‍ച്ച അടയ്ക്കല്‍ പ്രവൃത്തി നടന്നത്. ഗുരുതരമായ പ്രശ്‌നം നിലനിന്നിരുന്ന നെല്ലിക്കുന്ന് തെക്കുമ്പറം ഭാഗത്ത് ശനിയാഴ്ച രാത്രി ഏറെ വൈകിയും കനാല്‍ ബണ്ട് കോണ്‍ക്രീറ്റിംഗ് പ്രവൃത്തി നടന്നു. ജലപ്രവാഹത്തില്‍ ബണ്ട് തകരാതിരിക്കാന്‍ മര്‍ദ്ദം കുറയ്ക്കുന്നതിനായി ഈ ഭാഗത്ത് പൈപ്പിടുകയും ചെയ്തു. വെള്ളം ലഭിക്കാത്തതിനെ തുടര്‍ന്ന് വ്യാപകമായി നെല്‍കൃഷി ഉണങ്ങുന്നുവെന്ന പരാതിയെ തുടര്‍ന്നാണ് കനാല്‍ തുറന്നത്. മണ്ണാര്‍ക്കാട് താലൂക്കിന് പുറമേ ഒറ്റപ്പാലം താലൂക്കിലേയും ആയിരക്കണക്കിന് ഏക്ര നെല്‍കൃഷിയാണ് വെള്ളമില്ലാത്തതിനാല്‍ ഉണക്ക് ഭീഷണി നേരിടുന്നത്. തുലാമഴ കിട്ടാതെ വന്നതോടെയാണ് നെൽകർഷകർ കൂടുതൽ പ്രതിസന്ധിയിലായത്.
പ്രധാന കനാലിലൂടെ വെള്ളം വിട്ടെങ്കിലും തച്ചമ്പാറ പഞ്ചായത്തിലെ ചൂരിയോട് പാടത്ത് വെള്ളമെത്താൻ സബ് കനാൽ തുറന്നു വിടണം. ചൂരിയോട് പാടത്ത് എത്രയും പെട്ടെന്ന് വെള്ളമെത്തിക്കാൻ അടിയന്തര നടപടി സ്വീകരിക്കണമെന്ന് തച്ചമ്പാറ വികസന വേദി ആവശ്യപ്പെട്ടു.