query_builder Mon Dec 7 2020 12:49 AM
visibility 189
സംരക്ഷിത വനമേഖലയിലെ കുണ്ടും കുഴിയും നിറഞ്ഞ മൺറോഡിലൂടെയുള്ള മൂന്ന് കിലോമീറ്റർ ദുരിതയാത്ര അനുഭവിച്ചറിഞ്ഞ്‌ കേന്ദ്ര സഹമന്ത്രി വി. മുരളീധരൻ. അപകടം നിറഞ്ഞ വഴിയിലൂടെ വളരെ പതുക്കെയാണ് വാഹനം നീങ്ങിയത്. 'ദേലംപാടി കേരളത്തിൽ തന്നെയാണോ' എന്ന ഡ്രൈവറുടെ സംശയവും വഴിയിൽ കുടിവെള്ളം തലയിൽ ചുമന്ന് കൊണ്ടുപോകുന്ന വീട്ടമ്മയെക്കണ്ട കാര്യവും അദ്ദേഹം മല്ലംപാറ, ബളവന്തടുക്ക എന്നിവിടങ്ങളിലെ കുടുംബയോഗങ്ങളിൽ പങ്കുവെച്ചു.
ഇത് രണ്ടും ത്രിതല പഞ്ചായത്തും സംസ്ഥാനവും ഭരിക്കുന്നവർ കാണുന്നില്ലെന്നും നരേന്ദ്ര മോദി സർക്കാരിന്റെ ഗ്രാമീണ റോഡ്, കുടിവെള്ള പദ്ധതികൾ ജനങ്ങളിലേക്കെത്തണമെങ്കിൽ ബി.ജെ.പി. അധികാരത്തിൽ വരണമെന്നും അദ്ദേഹം പറഞ്ഞു.
സഹോദരന്മാർ തമ്മിലുള്ള മത്സരം കൊണ്ട് ശ്രദ്ധേയമായ വാർഡാണ് മല്ലംപാറ. ബി.ജെ.പി.യിലെ എൻ.സതീശന് വോട്ടഭ്യർഥിച്ചാണ് കേന്ദ്ര സഹമന്ത്രിയെത്തിയത്. ബളവന്തടുക്കയിൽ കെ. പ്രമീളയാണ് ബി.ജെ.പി. സ്ഥാനാർഥി.
ബി.ജെ.പി ദേലംപാടി പഞ്ചായത്ത് കമ്മിറ്റി പ്രസിഡൻ്റ്‌ പ്രദീപ് കുമാർ അധ്യക്ഷത വഹിച്ചു. ജില്ലാ അധ്യക്ഷൻ അഡ്വ. കെ. ശ്രീകാന്ത്, ദിലീപ് പള്ളഞ്ചി, ജില്ലാ പഞ്ചായത്ത് ദേലംപാടി ഡിവിഷനിൽനിന്ന് ജനവിധി തേടുന്ന സുധാമ ഗോസാഡ, ബ്ലോക്ക് പഞ്ചായത്ത് അഡൂർ, ദേലംപാടി ഡിവിഷനുകളിലേക്ക് മത്സരിക്കുന്ന രാജേഷ് പാണ്ടി, ജി. ബേബി എന്നിവരും ബി.ജെ.പി.യുടെ മറ്റു ഗ്രാമ, ബ്ലോക്ക് ജില്ലാ സ്ഥാനാർഥികളും പങ്കെടുത്തു.