query_builder Mon Dec 7 2020 6:39 AM
visibility 322
പത്തനംതിട്ട: ബിജെപി ജില്ലയില്‍ വച്ചുപുലര്‍ത്തുന്ന പ്രതീക്ഷയും അടിസ്ഥാനപരമായി അവരുടെ വോട്ടുബാങ്കിലുണ്ടായിട്ടുള്ള വര്‍ധനയും പ്രധാന ഘടകമാകുമ്പോള്‍ ഇത്തവണ മുന്നണികളുടെ വിജയപ്രതീക്ഷകള്‍ക്ക് തിരിച്ചടി നേരിടും. പ്രാദേശികതലത്തില്‍ ബിജെപി വോട്ടുകള്‍ വര്‍ധിച്ചാല്‍ പല തദ്ദേശസ്ഥാപനങ്ങളിലും വിധി നിര്‍ണായക ഘടകമായി അവര്‍ മാറും.ബിഡിജെഎസ് പിന്തുണയിലും എന്‍ഡിഎയ്ക്കു തികഞ്ഞ പ്രതീക്ഷയുണ്ട്.ജില്ലയില്‍ 2015ലെ തദ്ദേശ തെരഞ്ഞെടുപ്പില്‍ ഇരുമുന്നണികളും ഒപ്പത്തിനൊപ്പം എന്നതായിരുന്നു സ്ഥിതി. അതേ സ്ഥിതിവിശേഷം ഇത്തവണയും സംജാതമാകുമോയെന്നാശങ്കയിലാണ് ഇടത് വലത് മുന്നണികൾ.
2015ല്‍ ജില്ലാ പഞ്ചായത്തിലെ 16 ഡിവിഷനുകളില്‍ 11ലും യുഡിഎഫാണ് വിജയിച്ചത്. എട്ട് ബ്ലോക്ക് പഞ്ചായത്തുകളില്‍ അഞ്ചിലും യുഡിഎഫാണ് അധികാരത്തിലെത്തിയത്. 53 ഗ്രാമപഞ്ചായത്തുകളില്‍ 25 ല്‍ എല്‍ഡിഎഫും 21ല്‍ യുഡിഎഫുമായിരുന്നു ഭരണത്തില്‍. മൂന്നിടത്ത് ബിജെപി അധികാരത്തിലെത്തി. നാല് പഞ്ചായത്തുകളില്‍ സ്വതന്ത്രരാണ് ഭരണം നയിച്ചത്.
ജില്ലാ പഞ്ചായത്ത് ഭരണം നിലനിര്‍ത്താനാകുമെന്ന പ്രതീക്ഷയിലാണ് യുഡിഎഫ്. കോണ്‍ഗ്രസ് 14 മണ്ഡലങ്ങളിലും കേരള കോണ്‍ഗ്രസ് ജോസഫ് രണ്ടിടത്തുമാണ് മത്സരിക്കുന്നത്. അഞ്ച് മണ്ഡലങ്ങളിലെങ്കിലും യുഡിഎഫ് അനായാസ വിജയം പ്രതീക്ഷിക്കുന്നുണ്ട്. സ്ഥിരമായി യുഡിഎഫിനെ പിന്തുണച്ചുവരുന്ന ഈ മണ്ഡലങ്ങളോടൊപ്പം കടുത്ത പോരാട്ടത്തിനൊടുവില്‍ ജയിച്ചുകയറാനിടയുള്ള നാല് മണ്ഡലങ്ങള്‍ കൂടിയുണ്ട്. അരലക്ഷത്തിലധികം വോട്ടര്‍മാര്‍ ഓരോ മണ്ഡലത്തിലുമുണ്ട്. അതുകൊണ്ടുതന്നെ രാഷ്ട്രീയമത്സരമാകും ജില്ലാ പഞ്ചായത്ത് മണ്ഡലങ്ങളിലേതെന്ന് യുഡിഎഫ് കരുതുന്നു.
എല്‍ഡിഎഫ് ആറ് മണ്ഡലങ്ങളില്‍ അനായാസ വിജയം പ്രതീക്ഷിക്കുന്നുണ്ട്. യുഡിഎഫിന്‍റെ ശക്തികേന്ദ്രമെന്നു കരുതുന്ന മണ്ഡലങ്ങളില്‍പോലും ഇത്തവണ വെല്ലുവിളി ഉയര്‍ത്താനായിട്ടുണ്ടെന്നാണ് അവരുടെ പ്രതീക്ഷ. അവസാനവിജയം ഉറപ്പിച്ച്‌ ഭരണത്തിലെത്തുമെന്ന് നേതാക്കള്‍ വിലയിരുത്തി. 2005ല്‍ മാത്രമേ ഇതിനു മുന്പ് ജില്ലാ പഞ്ചായത്ത് എല്‍ഡിഎഫ് ഭരിച്ചിട്ടുള്ളൂ. സ്ഥാനാര്‍ഥികളുടെ മികവിലാണ് എല്‍ഡിഎഫ് പ്രാരണം നയിച്ചത്. സംസ്ഥാന രാഷ്ട്രീയത്തേക്കാള്‍ പ്രാദേശികവിഷയങ്ങളില്‍ അവര്‍ ഉൗന്നല്‍ നല്‍കുകയും ചെയ്തു.
സിപിഎം ജില്ലാ സെക്രട്ടേറിയറ്റംഗങ്ങള്‍ ഉള്‍പ്പെടെ മത്സരരംഗത്തുണ്ട്. ഒരു സീറ്റെങ്കിലും ജില്ലാ പഞ്ചായത്തില്‍ ലഭിക്കുമെന്ന പ്രതീക്ഷയിലാണ് എന്‍ഡിഎ. കുളനട, കോയിപ്രം മണ്ഡലങ്ങളിലാണ് അവരുടെ പ്രതീക്ഷ. കൂടാതെ ബിഡിജെഎസുമായി ചേര്‍ന്നു ശക്തമായ മത്സരം മറ്റെല്ലാ മണ്ഡലങ്ങളിലും എന്‍ഡിഎ നടത്തുന്നുണ്ട്.
കൊടുമണ്‍ ഉള്‍പ്പെടെയുള്ള മണ്ഡലങ്ങളില്‍ എന്‍ഡിഎ നേടുന്ന വോട്ടുകള്‍ ഇരുമുന്നണികളുടെയും ജയപരാജയങ്ങളെ സാരമായി ബാധിക്കാം.
പത്തനംതിട്ട, തിരുവല്ല നഗരസഭകള്‍ യുഡിഎഫില്‍ നിന്നു പിടിച്ചെടുക്കുകയാണ് എല്‍ഡിഎഫ് ലക്ഷ്യം. പന്തളവും അടൂരും നിലനിര്‍ത്താനും അവര്‍ ആഗ്രഹിക്കുന്നു. എന്നാല്‍ നാല് നഗരസഭകളും അവസാനം ഒപ്പം നില്‍ക്കുമെന്ന പ്രതീക്ഷയിലാണ് യുഡിഎഫ്.
നാല് നഗരസഭകളിലും യുഡിഎഫിനു വിമതഭീഷണി ശക്തമായുണ്ട്. കഴിഞ്ഞതവണ രണ്ടു നഗരസഭകളില്‍ ഭരണമുണ്ടായിരുന്നു. കേരള കോണ്‍ഗ്രസിലെ പിളര്‍പ്പും ചേരിമാറ്റവുമാണ് തിരുവല്ല, പത്തനംതിട്ട നഗരസഭകളില്‍ എല്‍ഡിഎഫ് പ്രതീക്ഷകള്‍ക്കു വകനല്‍കുന്നത്.
പത്തനംതിട്ടയിലും തിരുവല്ലയിലും യുഡിഎഫിനുള്ളിലെ തര്‍ക്കങ്ങള്‍ക്ക് പൂര്‍ണമായി പരിഹാരമായിട്ടില്ല. പല വാര്‍ഡുകളിലും പരസ്പരം മുന്നണികക്ഷികള്‍ ഏറ്റുമുട്ടുന്നുണ്ട്. ഇതോടൊപ്പം വിമതസ്ഥാനാര്‍ഥികളും വെല്ലുവിളിയാണ്. തികഞ്ഞ വിജയപ്രതീക്ഷയിലാണ് പത്തനംതിട്ടയില്‍ എല്‍ഡിഎഫ്. മുന്‍ ചെയര്‍മാന്‍ ടി. സക്കീര്‍ ഹുസൈനെ മുന്നില്‍നിര്‍ത്തിയാണ് മത്സരരംഗത്തുള്ളത്. സ്ഥാനാര്‍ഥി നിര്‍ണയത്തിലെ മികവും കേരള കോണ്‍ഗ്രസ് ജോസ് വിഭാഗത്തെ ഒപ്പം കൂട്ടിയതും പ്രയോജനപ്പെടുമെന്നാണ് അവരുടെ പ്രതീക്ഷ.
യുഡിഎഫിനു പക്ഷേ പത്തനംതിട്ടയില്‍ അവസാനം ജയിച്ചെത്തുമെന്ന കാര്യത്തില്‍ തര്‍ക്കമില്ല. പരന്പരാഗത വോട്ടുകള്‍ സ്വന്തം സ്ഥാനാര്‍ഥികള്‍ക്കുതന്നെ ലഭിക്കുമെന്നും ഒന്നോ രണ്ടോ വാര്‍ഡുകളിലൊഴികെ വിമതര്‍ കാര്യമായ വെല്ലുവിളിയല്ലെന്നും യുഡിഎഫ് നേതാക്കള്‍. പത്തനംതിട്ടയില്‍ ബിജെപിയും എസ്ഡിപിഐയും ചില വാര്‍ഡുകളില്‍ നിര്‍ണായകമാണ്. കൂടുതല്‍ സീറ്റ് ലക്ഷ്യമിട്ടാണ് ഇരുപാര്‍ട്ടികളും മത്സരിക്കുന്നത്.
തിരുവല്ലയില്‍ കേരള കോണ്‍ഗ്രസിലെ പിളര്‍പ്പാണ് വിധിനിര്‍ണായകമായി വരുന്നത്. യുഡിഎഫിനൊപ്പമുള്ള ജോസഫ് ഗ്രൂപ്പും കോണ്‍ഗ്രസുമായി ചില വാര്‍ഡുകളില്‍ തര്‍ക്കങ്ങള്‍ നിലനില്‍ക്കുകയാണ്. എന്നാല്‍ ഭരണത്തില്‍ തിരികെയെത്താനുള്ള സാധ്യതയ്ക്ക് ഇതു മങ്ങലേറ്റിട്ടില്ലെന്നാണ് യുഡിഎഫ് നേതാക്കളുടെ പക്ഷം. എല്‍ഡിഎഫാകട്ടെ ഇത്തവണ തിരുവല്ല പിടിച്ചെടുക്കുമെന്ന പ്രതീക്ഷയിലുമാണ്. ബിജെപി കൂടുതല്‍ സീറ്റുകളില്‍ വിജയം നേടുമെന്ന കണക്കുകൂട്ടലിലാണ്. സ്ഥാനാര്‍ഥികളുടെ മികവിലാണ് എന്‍ഡിഎ പ്രതീക്ഷ.
അടൂരില്‍ ഭരണം തിരികെപിടിക്കാമെന്ന പ്രതീക്ഷ യുഡിഎഫിനുണ്ട്. വിമതഭീഷണി രണ്ട് മുന്നണികള്‍ക്കുമുണ്ട്. ചെയര്‍മാന്‍ സ്ഥാനം ജനറലായതിനാല്‍ നേതാക്കളുടെ വാര്‍ഡുകളില്‍ പോലും ശക്തമായ മത്സരമാണ്. പന്തളം നഗരസഭയില്‍ ഭരണം നിലനിര്‍ത്താനുള്ള പോരാട്ടത്തിലാണ് എല്‍ഡിഎഫ്.
എന്നാല്‍ എല്ലാ വാര്‍ഡുകളിലും ശക്തമായ പോരാട്ടമാണ് യുഡിഎഫ് നടത്തുന്നത്. ഇത്തവണ പന്തളത്തു ജയിക്കാനാകുമെന്ന പ്രതീക്ഷ യുഡിഎഫനുമുണ്ട്. ബിജെപിയും എസ്ഡിപിഐയും പന്തളത്തും നിര്‍ണായക ശക്തിയായി മാറാന്‍ സാധ്യതയുണ്ട്.
എട്ട് ബ്ലോക്ക് പഞ്ചായത്തുകളില്‍ ഭൂരിപക്ഷം ഉറപ്പിക്കാനുള്ള ശ്രമത്തിലാണ് മുന്നണികള്‍. എട്ടില്‍ ഏഴ് ബ്ലോക്കുവരെ മുന്പ് യുഡിഎഫിനു ലഭിച്ചിരുന്നു. യുഡിഎഫിനെ സ്ഥിരമായി പിന്തുണച്ചുവരുന്ന ബ്ലോക്ക് പഞ്ചായത്തുകളാണ് ഭൂരിപക്ഷവും. ഇത്തവണ ബ്ലോക്ക് ഡിവിഷന്‍ വാര്‍ഡുകളില്‍ പലയിടത്തും സ്ഥാനാര്‍ഥി നിര്‍ണയത്തിലെ തര്‍ക്കങ്ങള്‍ നിലനില്‍ക്കുന്നത് യുഡിഎഫിനു വെല്ലുവിളിയായിട്ടുണ്ട്.
എല്‍ഡിഎഫില്‍ ബ്ലോക്ക് പഞ്ചായത്ത് സീറ്റുവിഭജനം നേരത്തെതന്നെ പൂര്‍ത്തീകരിച്ചിരുന്നു. പറക്കോട് ഒഴികെയുള്ള ബ്ലോക്കുകളില്‍ കേരള കോണ്‍ഗ്രസ് ജോസ് വിഭാഗത്തിനു പ്രാതിനിധ്യവും നല്‍കി. എട്ട് ബ്ലോക്കുകളില്‍ കോയിപ്രത്തു മാത്രമാണ് കഴിഞ്ഞതവണ ബിജെപിക്കു പ്രതിനിധിയുണ്ടായിരുന്നത്. ഇത്തവണ പല ബ്ലോക്ക് ഡിവിഷനുകളിലും എന്‍ഡിഎ ശക്തമായ പോരാട്ടമാണ് നടത്തിയിരിക്കുന്നത്.
രാഷ്ട്രീയത്തിനതീതമായി വ്യക്തിബന്ധങ്ങളും സ്വതന്ത്രരുടെ ഇടപെടലുമൊക്കെ ഗ്രാമ പഞ്ചായത്ത് വാര്‍ഡുകളില്‍ വിധി നിര്‍ണായകമാകും. വിജയിച്ചെത്തുന്ന രാഷ്ട്രീയ സ്ഥാനാര്‍ഥികളേക്കാള്‍ സ്വതന്ത്രരും ചെറിയകക്ഷികളുമൊക്കെ നിര്‍ണായകമായേക്കാവുന്ന ഘട്ടത്തിലേക്കെത്തുമെന്നാണ് സൂചന.
ഗ്രാമപഞ്ചായത്ത് നഗരസഭ വാര്‍ഡുകളില്‍ മൂന്നു മുന്നണികള്‍ക്കും വിമതഭീഷണി ഉണ്ട. ഇടതു, വലതു മുന്നണികൾ സ്വന്തം ചിഹ്നത്തില്‍ മത്സരിക്കാതെ സ്വതന്ത്രരായി മത്സരിക്കുന്ന വാര്‍ഡുകളും ജില്ലയിലുണ്ട്. ബിജെപി യാണ് സ്വന്തം ചിഹ്നത്തിൽ കൂടുതൽ സ്ഥാനാർത്ഥികളെ വാർഡുകളിൽ നിർത്തി മത്സരിപ്പിക്കുന്നത്. പ്രസിഡന്‍റ് സ്ഥാനാര്‍ഥികളെ വരെ അവതരിപ്പിച്ചാണ് പല ഗ്രാമപഞ്ചായത്തുകളിലും മൂന്നു മുന്നണികളുടേയും മത്സരം.
കഴിഞ്ഞതവണ ജില്ലയിലെ മൂന്ന് ഗ്രാമപഞ്ചായത്തുകളില്‍ ഭരണം പിടിച്ച ബിജെപി ഇത്തവണ കൂടുതല്‍ ഗ്രാമപഞ്ചായത്തുകള്‍ ലക്ഷ്യമിട്ടു തന്നെയാണ് ദേശീയ ജനാധിപത്യ സഖ്യമായി മത്സരിക്കുന്നത്. ബിജെപി യുടെ കടന്നുകയറ്റത്തെ തടസപെടുത്തുവാൻ ഇരുമുന്നണികളും പ്രാദേശികമായി ധാരണയിലെത്തിയെന്നാണ് സൂചനകൾ.