query_builder Mon Dec 7 2020 1:32 PM
visibility 324
വീഡിയോ കാസറ്റുകള്‍ക്ക് പകരം സീഡികള്‍ പുറത്തിങ്ങിയതോടെ ഇവ ഒരു പ്രതാപ കാലത്തിന്റെ ഓര്‍മ്മയായി അലമാരിയില്‍ ഒതുങ്ങി
അടിമാലി: പഴയ പ്രതാപ കാലത്തിന്റെ ഓര്‍മ്മകള്‍ നിലനിര്‍ത്തി വീഡിയോ കാസറ്റുകളുടെ വലിയ ശേഖരം ഇന്നും നിധിപോലെ സൂക്ഷിക്കുകയാണ് രാജാക്കാട് സ്വദേശി കൃഷ്ണവിലാസം മഹേഷ് എന്ന ചെറുപ്പക്കാരന്‍.ഒരു കാലത്ത് മഹേഷിന്റെ പ്രധാന വരുമാനം കൂടിയായിരുന്നു ഈ കാസറ്റുകള്‍. ഐ റ്റി വികസനം ആധുനിക ലോകത്തില്‍ അനുദിനം വലിയ മാറ്റങ്ങളാണ് സൃഷ്ടിക്കുന്നത്. വികസന മുന്നേറ്റത്തില്‍ പലതും പഴയ
കാലത്തിന്റെ ഓര്‍മ്മകളായി അവശേഷിക്കുകയാണ്. അത്തരം ഓര്‍മ്മകളില്‍ ഒന്നാണ് മഹേഷിന്റെ ഓഫീസ് മുറിയിലെ അലമാരയില്‍ ഇന്നും നിരന്നിരിക്കുന്നത്.മനുഷ്യനെ ഏറ്റവും കൂടുതല്‍ സ്വാധീനിക്കുന്ന സിനിമയെന്ന കലയെ വീടുകളിലെ സ്വീകരണ മുറികളിലേക്ക് എത്തിച്ചിരുന്നത് ഈ കാസറ്റുകള്‍ക്കുള്ളിലെ റോളുകളാണ്. എണ്‍പതുകളിലെ ഈ ഓര്‍മ്മകള്‍ അന്ന് മഹേഷിന്റെ പ്രധാന വരുമാന മാര്‍ഗ്ഗമായിരുന്നു.ഒരു കാലത്ത് പുത്തന്‍ പണക്കാരുടെ സ്വീകരണ മുറികളിലെ രാജ കിരീടമായിരുന്നു ടെലിവിഷനുകള്‍. സിനിമയും സീരികയലുകളും മാറ്റി മാറ്റി വക്കുവാന്‍ അധികം ചാനലുകളും ഇല്ലാതിരുന്ന കാലത്ത് ഇവര്‍ ആശ്രയിച്ചിരുന്നത് വി സി പിയും, വി സി ആറും വീഡിയോ കാസറ്റുകളുമാണ്. അതുകൊണ്ട് തന്നെ ഇവ വാടകക്ക് നല്‍കി വരുമാനം കണ്ടെത്തുന്നതിനായി പുതിയതായി ഇറങ്ങുന്ന സിനിമകളുടെ പ്രിന്റുകള്‍ മഹേഷ് വാങ്ങി കൂട്ടുകയായിരുന്നു.വീഡിയോ കാസറ്റുകള്‍ക്ക് പകരം സീഡികള്‍ പുറത്തിങ്ങിയതോടെ ഇവ ഒരു പ്രതാപ കാലത്തിന്റെ ഓര്‍മ്മയായി അലമാരിയില്‍ ഒതുങ്ങി.ഒരു കാലത്ത് തന്റെ പ്രധാന വരുമാന മാര്‍ഗ്ഗമായിരുന്ന ഇവ വാങ്ങുവാന്‍ നിരവധി ആളുകള്‍ വന്നിരുന്നെങ്കിലും ജീവിതത്തിന്റെ ഭാഗമായി മാറിയ ഇവ വിറ്റഴിക്കുവാന്‍ മഹേഷ് തയ്യറായില്ല.