query_builder Mon Dec 7 2020 1:44 PM
visibility 323
നാല് പവന്‍ തൂക്കം വരുന്ന മാലയാണ് മോഷ്ടാക്കള്‍ അപഹരിച്ചത്
അടിമാലി: ഇരുചക്രവാഹനത്തിലെത്തിയ മോഷ്ടാക്കള്‍ റോഡിലൂടെ നടന്നു വരികയായിരുന്ന അറുപത്തിരണ്ടുകാരിയുടെ കഴുത്തില്‍ നിന്നും മാല പൊട്ടിച്ച് രക്ഷപ്പെട്ടു.അടിമാലി മന്നാങ്കാലായില്‍ ആണ് സംഭവം നടന്നത്.നാല് പവന്‍ തൂക്കം വരുന്ന മാലയാണ് മോഷ്ടാക്കള്‍ അപഹരിച്ചത്.
അടിമാലി മന്നാങ്കാല സ്വദേശിനി കണ്ണികാട്ടേല്‍ ലളിത കൃഷ്ണന്‍കുട്ടിയുടെ കഴുത്തില്‍ നിന്നുമാണ് ബൈക്കിലെത്തിയ രണ്ടംഗ സംഘം മാല പൊട്ടിച്ച് രക്ഷപ്പെട്ടത്.പുല്ല് മുറിച്ച ശേഷം റോഡിലൂടെ വീട്ടിലേക്ക് പുല്ല് ചുമന്ന് കൊണ്ടു വരുന്നതിനിടയില്‍ ബൈക്കിലെത്തിയവര്‍ കഴുത്തില്‍ നിന്നും മാലപൊട്ടിച്ച് രക്ഷപ്പെടുകയായിരുന്നുവെന്ന് ലളിത പറഞ്ഞു.സംഭവ സമയത്ത് റോഡില്‍ മറ്റ് യാത്രക്കാരാരും ഉണ്ടായിരുന്നില്ല.മാലപൊട്ടിച്ച ഉടനെ ലളിത ബഹളം വച്ച് ഒരല്‍പ്പ ദൂരം പിറകെ ഓടിയെങ്കിലും മോഷ്ടാക്കള്‍ രക്ഷപ്പെട്ടു.തുടര്‍ന്ന് ലളിത വീട്ടിലെത്തി വിവരം പറയുകയും അടിമാലി പോലീസില്‍ പരാതി നല്‍കുകയും ചെയ്തു.മോഷ്ടാക്കളുടേതെന്ന് കരുതുന്ന ചില സിസിടിവി ദൃശ്യങ്ങള്‍ പോലീസിന് ലഭിച്ചതായാണ് സൂചന.ഇതിന്റെ അടിസ്ഥാനത്തില്‍ പോലീസ് അന്വേഷണം ഊര്‍ജ്ജിതമാക്കി.